09/17/2009 | Меджлис-Информ

Къыйметли ватандашлар, мухтерем дин къардaшлар!

Келеяткъан мукъаддес Рамазан байрамы иле эпинъизни самимий хайырлаймыз!

Юдже динимиз шартларындан келип чыкъкъан оразанъызны, эда эткен ибадетлеринъизни Алла къабул ве макъбул эйлесин!
Эр бир къорантада даима бахт-сеадет, къавий сагълыкъ, къуванчлы ве айдын куньлер укюм сюрсин, софраларынъыз даима бол къысметли олсун!
Ораза куньлерини темчит ве ифтарларнен кечирген диндашларымыз, эминмиз, сабырларыны арттырды ве сагълыкъларыны пекиттилер. Бу диний ве миллий байрамымыз бирлик-бераберлигимизни, ирадемизни, иншалла, даа зияде къавийлештирир ве акъ-укъукъларымыз, шу джумледен миллий девлетчилигимизнинъ тикленильмеси огърундаки курешимизге къуветли таянч, ватанда саипликни къолгъа алмакъ елунда сильтем олур.
Байрам мунасебетинен бутюн Къырым мусульманларына эйилик истеп, арзу-умютлеринъизни ерине кетирильмесине Алла ярдымджы олсун, деймиз.
Эр бир миллетдешимиз ве диндашымызгъа тынчлыкъ, сагълыкъ-селяметлик, сеадет, барлыкъ, умют къавийлиги тилеймиз!

Къырымтатар Миллий Меджлиси
2009 с.