01/29/2009 | Munever

Базыда дуа-сеналарда я да дигер мерасимлерде топлангъан къадынларымызнынъ къапалы къадын-къызлар акъкъындаки къызгъын лакъырдыларыны эшитмек мумкюн. Дейлер ки, бу араплардан алынгъан мода, бизим адетимизде ёкъ, чюнки биталарымыз бойле юрмей эдилер. Мен бу эмиш-демишлерге сонъ бермек истейим. Бу ич бир тюрлю арап модасы дегиль, бу - Алланынъ эмири иле кийинген мусульман къадыннынъ къыяфетидир. Эм бу къадыннынъ миллетине я да урф-адетлерине багълы дегиль. Акъикъий мусульман къадынынынъ эллери ве юзюнден гъайры эр ери къапалы олмакъ керек. Бу акъта Къуран-ы Керимде ве чокътан-чокъ хадислерде де айтыла.

Иште, арап къадынлары динимизге зияде дикъкъат этип, Алланынъ эмирлери боюнджа яшамагъа тырышалар. Алла къоркъусы оларны бойле кийинмеге меджбур эте. Ве айны шу дуйгъу бугуньде-бугунь бир чокъ къадынларны Авропа бичимли урбалардан вазгечип, асыл къыяфетке къайтара.

Сабыкъ Советлер мемлекетинде яшагъан мусульман къадынлары, шу джумледен бизим къырымтатар къадын-къызларымыз исе динсизлик сиясетининъ тазыйыгъы алтында къалдылар. Кучьлю боран киби атылып кирген советлер акимиети джамилерни, ибадетханелерни ернен ексан этип, халкъларнынъ диний урф-адетлерини ёкъ этти ве белли бир муддетке озь макъсадына иришкен киби олды. Амма маневий дегерликни ёкъ этмек мумкюн дегиль. Инсан эртеми-кечми Раббисине дёне.

Шу вакъиалар гирдабына тюшкен къартана-биталарымыз да несильден-несильге Ислямдан узакълашып башладылар, намазларыны унуттылар, урбаларыны денъиштирдилер. Бугунь биз оларгъа такълид этмемиз янълыш, оларнынъ насыл девирде яшагъанларыны унутмамакъ керекмиз. Ойле бакъаджакъ олсакъ бизим биталарымыз къыскъа штанларда (шорты), тар этеклерде, кокюсининъ яры ачыкъ антерлерде де юрмегенлер, башларында мытлакъа къыйыкълары олгъан. Я ярын бизим торунларымыз ве оларнынъ балалары бугуньки къызларданмы ибрет аладжакълар?

Уйкен несильге урьметимиз не къадар буюк олмасын, оларнынъ диний манада юрюш-турушлары, арекетлери биз ичюн нумюне дегиль. Инсанлар янъыла билелер, хаталаргъа ёл берелер. Биз исе тек Къуран-ы Керимнинъ къанунлары боюнджа яшамакъ борджлумыз, эр бир арекетимизни шу Китапкъа бакъып япмалымыз. Диний ёлдан сапкъанларны Ярадан насыл джезалагъаныны, нидже-нидже халкълар ер юзюнден силинип кеткенлерини унутмайыкъ. Лякин Раббимизнинъ рахмети ве шефкъаты сынъырсыздыр. О, бизлерге тенбие бере, догъру ёлгъа къайткъанымызны истей.

Муневер Келямова,

Сеит-Сеттар джамиси янындаки медресе талебеси.